Bjarki í toppbaráttunni í Frakklandi
Guðmundur Ágúst Kristjánsson og Bjarki Pétursson léku í dag þriðja hring Hopps Open de Provence mótsins á Áskorendamótaröð Evrópu.
Guðmundur sem var í 7. sæti mótsins fyrir hring dagsins náði sér ekki eins vel á strik eins og í gær og lék á höggi yfir pari í dag. Við það féll hann niður í 25. sæti mótsins. Með góðum hring á morgun á hann frábæra möguleika á að styrkja stöðu sína á stigalistanum í baráttunni um að komast inn á lokamótið.
Bjarki átti frábæran hring í dag og lék á fjórum höggum undir pari þrátt fyrir að hafa fengið skolla á lokaholu dagsins. Við það fór Bjarki úr 23. sæti og upp í það 11. Besti árangur Bjarka til þessa á mótaröðinni er 66. sæti. Hann á því alla möguleika á að stórbæta þann árangur með góðri spilamennsku á morgun.
Lukas Nemecz frá Austurríki er efstur í mótinu á 18 höggum undir pari.
