Guðmundur og Bjarki í góðum málum í Frakklandi
Annar hringur Hopps Open de Provence á Áskorendamótaröð Evrópu var leikinn í dag.
Íslensku kylfingarnir áttu misjöfnu gengi að fagna.
Guðmundur Ágúst Kristjánsson og Bjarki Pétursson eru í fínum málum og fóru örugglega í gegnum niðurskurðinn en Andri Þór Björnsson og Haraldur Franklín Magnus eru úr leik.
Guðmundur Ágúst er á átta höggum undir pari og jafn í 7. sæti mótsins. Hann lék hring dagsins á fimm höggum undir pari án þess að fá skolla.
Bjarki Pétursson lék einnig vel og er samtals á fimm höggum undir pari eftir að hafa leikið á tveimur undir í dag. Bjarki er ásamt öðrum í 23. sæti mótsins.
Andri lauk leik á tveimur höggum yfir pari og var fjórum höggum frá því að komast í gegnum niðurskurðinn. Haraldur var ólíkur sjálfum sér og var langt frá því að komast áfram.
Lukas Nemecz frá Austurríki er efstur á 14 höggum undir pari.
