Örninn 2026
Örninn 2026

Fréttir

Tiger Woods snýr aftur til keppni eftir rúmlega tveggja ára fjarveru
Fimmtudagur 19. nóvember 2026 kl. 10:02

Tiger Woods snýr aftur til keppni eftir rúmlega tveggja ára fjarveru

Goðsögnin Tiger Woods hefur staðfest að hann muni snúa aftur til keppni í næsta mánuði. Woods, sem er fimmtugur og hefur unnið 15 risamót á ferlinum, verður meðal keppenda á Hero World Challenge á Bahamaeyjum dagana 3.–6. desember. Þetta verður fyrsta hefðbundna 72 holu mótið sem hann tekur þátt í frá Opna breska meistaramótinu sumarið 2024.

Woods staðfesti þátttökuna á þriðjudag og verður einn 20 kylfinga sem keppa á mótinu, sem fram fer á Albany-golfvellinum á Bahamaeyjum. Mótið er haldið á vegum góðgerðarsjóðs hans og hefur Woods áður notað það til að snúa aftur til keppni eftir meiðsli.

Síðast lék Woods á Opna breska meistaramótinu á Royal Troon í júlí 2024, þar sem hann komst ekki í gegnum niðurskurðinn. Hann hefur síðan glímt við þrálát meiðsli og meðal annars gengist undir tvær bakaðgerðir og aðgerð vegna meiðsla á hásin.

Woods tók einnig þátt í PNC Championship ásamt syni sínum Charlie í desember 2024 og hefur leikið í TGL-innanhússmótaröðinni, en ekki tekið þátt í hefðbundnu 72 holu móti síðan á Royal Troon.

Erfið ár að baki

Síðustu ár hafa reynst Woods erfið, bæði innan og utan golfvallarins. Hann hefur glímt við afleiðingar alvarlegs bílslyss árið 2021 og fjölmargar aðgerðir á baki og fótleggjum.

Í mars síðastliðnum lenti Woods í öðru bílslysi í Flórída og var handtekinn grunaður um akstur undir áhrifum. Hann gekkst síðar undir meðferð og í september lauk málinu með því að hann mótmælti ekki ákæru um gáleysislegan akstur og synjun á lögmætri sýnatöku. Ökuréttindi hans voru svipt í fimm ár.

Woods hefur að undanförnu aukið æfingar sínar og lét nýlega hafa eftir sér í viðtali við SiriusXM PGA Tour Radio að líðanin væri orðin betri.

„Mér líður betur, það er enginn vafi á því. Ég hef æft töluvert,“ sagði Woods.

Mætir sterkum kylfingum

Hero World Challenge er boðsmót þar sem 20 kylfingar taka þátt. Mótið telst ekki til opinberrar mótaskrár PGA-mótaraðarinnar en veitir stig á heimslistanum.

Á meðal keppenda verða Scottie Scheffler, efsti kylfingur heimslistans, Hideki Matsuyama, sem á titil að verja, auk Rickie Fowler og Gary Woodland.

Woods hefur fimm sinnum sigrað á Hero World Challenge, síðast árið 2011. Hann tók síðast þátt í mótinu árið 2023 og hafnaði þá í 18. sæti.

Gæti leikið með syni sínum fyrir jól

Endurkoma Woods vekur einnig spurningar um hvort hann muni taka þátt í PNC Championship ásamt syni sínum Charlie í desember. Feðgarnir hafa áður vakið mikla athygli á því móti og höfnuðu í öðru sæti árið 2024.

Þátttaka þeirra hefur þó ekki verið staðfest.

Woods, sem verður 51 árs í lok desember, hefur unnið 82 mót á PGA-mótaröðinni og deilir þar með Sam Snead metinu yfir flesta sigra. Hann hefur ekki unnið mót síðan á Zozo Championship í Japan árið 2019.

Endurkoman á Bahamaeyjum verður því mikið tilhlökkunarefni fyrir golfáhugamenn um allan heim. Stóra spurningin er hvort Woods geti enn á ný komið sér í nægilega gott keppnisform til að láta að sér kveða á stærstu mótum heims.