Fox með timburmenn eftir sigurinn á OPNA meistaramótinu

Ryan Fox sem sigraði á OPNA mótinu á Royal Birkdale í júlí viðurkennir að honum finnist erfiðara að hunsa auknar væntingar sem gerðar eru til hans eftir sögulegan sigur hans á meistaramótinu. Fox undirbýr sig nú fyrir Tour Championship-mótið á East Lake, þar sem Nýsjálendingurinn mun keppa á meðal 30 efstu kylfinganna á FedExCup-stigalistanum.

Þessi 38 ára gamli kylfingur hefur átt erfiða endurkomu á PGA-mótaröðina og hefur glímt við dræverinn eftir að hafa tekið sér frí frá golfinu í kjölfar sigursins á Opna breska.

Allt frá hetjudáðum sínum á Royal Birkdale hefur Fox átt í erfiðleikum með að endurtaka það form, en hann endaði í 58. sæti á FedEx St. Jude Championship-mótinu og í 47. sæti á BMW Championship-mótinu sem voru tvö úrslitamótin á FedEx fyrir lokamótið.

Fox sagðist einnig hafa tekið eftir breytingu á hugarfari sínu, þar sem aukin athygli gerði það erfiðara að halda þolinmæðinni á vellinum.

„Ég á sennilega svolítið erfitt með að einbeita mér á golfvellinum um þessar mundir,“ sagði Fox í hlaðvarpsviðtali við Sport Nation.

„Ég verð svolítið fljótur að pirra mig eftir að hafa slegið slæmt högg. Ég veit ekki hvort væntingarnar hafi breyst eða hvort ég sé bara aðeins harðari við sjálfan mig á köflum,“ sagði Fox en hann vakti einmitt athygli fyrir fljótan leik og að vera ekki að velta sér upp úr mistökum.

„Fyrir mánuði síðan var ég á toppi heimsins og fannst eins og ég gæti ekkert gert rangt, tók nokkurra vikna frí og allt í einu get ég ekki hitt á braut og ekki sett ofan í pútt.“

Fox hefur unnið með teymi sínu að því að endurheimta dræverinn sem hjálpaði honum að vinna Opna breska, en viðurkennir um leið að hann gæti verið að reyna of mikið að endurtaka nýlegan árangur sinn.

„Ég er kannski að reyna of mikið að vilja spila vel,“ sagði hann. „Stundum er golfið ekki þannig. Ef maður reynir of mikið verður maður í raun verri.“