Íslensk ungmenni gerðu það gott í Hollandi
Íslenskir kylfingar stóðu sig vel á Tulip Challenge mótinu sem lauk í Hollandi á sunnudaginn síðasta.
Mótið er hluti af Global Golf Junior mótaröðinni. Alls voru 24 þátttakendur frá Íslandi á mótinu.
Aron Emil Gunnarsson úr Golfklúbbi Selfoss sigraði á mótinu í drengjaflokki. Hann lék hringina þrjá samtals á pari og varð höggi á undan heimamanninum Ricardo Veldman.
Í stúlknaflokki sigraði Perla Sól Sigurbrandsdóttir úr Golfklúbbi Reykjavíkur á samtals sjö höggum yfir pari. Perla endaði tveimur höggum á undan heimastúlkunni Fleur Van Beek og hinni dönsku Rie Lapholm.
Skúli Gunnar Ágústsson úr Golfklúbbi Akureyrar sigraði í flokki 18 ára og yngri en Skúli lék hringina þrjá á 2 höggum yfir pari.
