Tapaði ástríðunni fyrir golfinu en fann hana aftur á öðrum forsendum

Kylfingur dagsins byrjaði ungur að spila golf og var farinn að keppa á meðal þeirra bestu en tapaði ástríðunni og snerti ekki kylfu í nokkur ár. Árið 2021 byrjaði hann svo aftur en á öðrum forsendum og í dag finnst honum fátt skemmtilegra en að spila golf. Samhliða því að byrja aftur að spila, fór hann að taka upp og senda út stutt myndbönd úr golfhringjum með félögum sínum. Hann hafði alltaf haft ástríðu fyrir að búa til myndbönd og gat þarna slegið tvær golfkúlur í einu höggi! Myndböndin eru í stöðugri þróun og eftir mikla hvatningu byrjaði hann svo með Instagram-síðu; Fannargolf. Á síðunni sýnir hann frá völlum vítt og breitt um landið, sýnir nýjar græjur og alls kyns annað tengt golfinu. Markmiðið er að taka golfið af krafti í sumar og ná að sýna frá öllum völlum landsins á næstu árum.

Fannar Jóhannsson er kylfingur dagsins.

Hvenær byrjaðir þú í golfi og hvernig gerðist það?

Pabbi fékk golfdelluna um aldamótin og ég fékk að elta hann í sportið. Námskeið urðu að æfingum og æfingar urðu að heilu dögunum sem maður eyddi á golfvellinum.

Helstu afrek í golfinu?

Við strákarnir urðum Íslandsmeistarar golfklúbba 18 ára og yngri á Hellu sem er minning sem ég held sérstaklega upp á. Það var líka í síðasta skiptið sem ég keppti í golfi, flott að hætta á toppnum.

Hvað er það neyðarlegasta sem þú hefur lent í á golfvellinum?

Kannski var þetta ekki neyðarlegt en í augnablikinu fannst mér þetta hrottalegt. Við vinirnir fórum saman til Abu Dhabi fyrir nokkrum árum, og fyrir tilviljun var Abu Dhabi Championship á sama tíma og við vorum úti. Við fórum og horfðum á æfingahringinn sem var mögnuð upplifun. Hinn almenni borgari var greinilega ekki jafn spenntur og við, þar sem svo gott sem enginn annar var á vellinum að horfa. Þetta skapaði greinilega þægilegt andrúmsloft fyrir kylfingana, þar sem við gátum bara labbað brautirnar með þeim og spjallað við þá flesta. Rory McIlroy, Henrik Stenson, Bryson DeChambeau, það voru allir þarna. Aron vinur minn sá fyrir sér upplagt tækifæri og tók myndir af sér með öllum kylfingunum sem við hittum. Þegar ég var að taka mynd af honum með Justin Rose brá mér þó heldur betur í brún þegar mjög stór maður hoppar á bakið á mér og öskrar. Alls kyns hlutir fóru í gegn um hausinn á mér, var þetta öryggisvörður að henda okkur af vellinum eða bara snarruglaður maður að ráðast á mig. Með hjartað í buxunum leit ég upp og sá engann annan en Dustin Johnson, sem var á þeim tíma besti golfari heims, grenja úr hlátri eftir að hafa náð að hrekkja mig. Ég var svo hissa eftir þessa atburðarás að ég held ég hafi ekki komið upp orði þegar ég reyndi að tala við hann.

Hver er „frægasti“ kylfingurinn sem þú hefur leikið með?

Gunnar Nelson, golfsjúklingur

Ertu hjátrúarfull/ur hvað varðar golf?

Já, og alveg það mikið að ég skammast mín fyrir það. Ég get t.d. ekki púttað fyrr en ég er búinn að koma grínmerkinu fullkomlega fyrir á segulfestingunni sem ég er með í vasanum. Ef ég næ ekki góðri snertingu við grasið í æfingasveiflunni er ekki séns að ég slái gott högg. Meira ruglið.