Tvö draumahögg í sama leiknum annan daginn í röð á Hornafirði
Þeir voru aldeilis heitir kylfingarnir í Íslandsmóti klúbba í 5. deild á Silfurnesvelli um síðustu helgi. Við sögðum frá tveimur draumahöggum á öðrum keppnisdegi þar sem tveir kylfingar fóru holu í höggi í sama leiknum. Ótrúlegt en satt þá gerðist það aftur á lokadegi mótsins. Tveir kylfingar fóru holu í höggi í sama leik.
Dalvíkingurinn Kristbjörn Arngrímsson smellti kúlunni beint ofan í 2. braut í leik gegn Ásgeiri Ragnarsyni frá Golfklúbbi Vestarr. Ásgeir lét það ekkert á sig fá og lokaði leik þeirra félaga á 8. braut (17. holu) með því að setja boltann í holu með tilþrifum. Ásgeir gulltryggði þar sigur Vestarr í mótinu. Sonur Ásgeirs, Heimir Þór, var annar tveggja þeira frá fyrri deginum sem negldi í holuna. Hreint magnað.
Fjórir Einherjar eftir Íslandsmót klúbba í 5. deild á Hornafirði. Ásgeir, Heimir Þór, Halldór og Kristbjörn.