Keppni hafin á BMW PGA meistaramótinu
Eitt stærsta mót ársins á Evrópumótaröðinni hófst í gær á Wentworth vellinum í Surrey á Englandi.
Mótið er ansi mikilvægt fyrir marga kylfinga sem freista þess að tryggja sér sæti í Ryder liði Evrópu en Padraig Harrington mun tilkynna liðið í næstu viku.
Eftir fyrsta hring eru Kiradech Aphibarnrat og Christian Bezuidenhout sem eru efstir á 8 höggum undir pari. Adam Scott lék einnig frábærlega í gær og er á 7 höggum undir pari í þriðja sæti.
Justin Rose er á meðal kylfinga sem eru jafnir í fjórða sæti á 5 höggum undir pari. Gott mót hjá honum gæti dugað til þess að hann hljóti náð fyrir augum Padraig Harrington í næstu viku.