Andri: Nýtti færin ekki nógu vel
Andri Þór Björnsson GR lék í dag þriðja hringinn á lokaúrtökumótinu fyrir Evrópumótaröð karla á parinu og er því samtals á 2 höggum yfir pari í mótinu.
Andri lék á Lakes vellinum á Lumine svæðinu í dag og leikur á Hills vellinum á morgun.
Í viðtali við Kylfing sagði Andri að hann hefði verið að slá vel á þriðja hringnum en að hann hafi ekki verið að nýta færin alveg nógu vel.
Eftir fjóra hringi í mótinu verður skorið niður og halda þá 70 kylfingar áfram. Fyrir fjórða hringinn er Andri jafn í 121. sæti og þarf því á góðum hring að halda á morgun til þess að komast áfram. Andri ætlar þó ekki að skoða stöðuna fyrr en að hringnum loknum.
„Ég ætla bara að fara út á völl, gera mitt allra besta og skilja ekkert eftir. Síðan sjáum við bara hvað setur.“
