Steve Stricker að jafna sig eftir alvarleg veikindi
Steve Stricker fyrirliði Bandaríkjanna í síðustu Ryderkeppni segist vera heppinn að vera á lífi eftir að hafa verið tvívegis lagður inn á spítala með bólgur í kringum hjarta. Að auki glímdi Stricker við lifrarvandamál og óreglulegan hjartslátt.
Stricker missti 12 kíló í veikindunum sem læknar hafa ekki fundið neina skýringu á. Í viðtali við Wisconsin Golf sló hann á létta strengi og sagðist líta út eins og 85 ára gamall maður með húðina hangandi utan á sér.
Hann er nú staddur í Bradenton í Flórída þar sem hann jafnar sig af veikindum og segist vera á réttri leið. Hjartslátturinn orðinn reglulegur og uppbyggingarfasi tekinn við. Hann hefur sett sér það markmið að snúa aftur á golfvöllinn í mars þegar Players mótið fer fram í Jacksonville.