Lee6 efst á Evian þegar keppni er hálfnuð
Öðrum hring Evian risamótsins er lokið. Þegar keppni er hálfnuð er það hin Suður kóreska Jeungeun Lee6 sem leiðir mótið.
Hin 25 ára Lee6 hefur leikið hringina tvo á samtals 15 höggum undir pari og er 3 höggum á undan Ariya Jutanugarn og Pajaree Anannarukarn sem báðar koma frá Taílandi. Lee6 lék hringinn í dag á 61 höggi og jafnaði lægsta skor sögunnar á risamóti.
Þessar þrjár hafa skorið sig nokkuð frá öðrum keppendum en næstar koma Lydia Ko og Yealimi Noh á 9 höggum undir pari.
Keppni heldur áfram í fyrramálið en niðurskurðurinn miðast við þá sem leiki hafa á einu höggi yfir pari eða betur.
