Íslandsmót golfklúbba í yngri flokkum - úrslit
Íslandsmótum golfklúbba í yngri flokkum lauk í vikunni.
Alls tóku lið frá 11 golfklúbbum þátt í mótunum, sem leikin voru á Strandarvelli á Hellu og Garðavelli á Akranesi.
Lið Golfklúbbsins Leynis frá Akranesi fagnaði sigri í flokki drengja 18 ára og yngri. Lið Leynis sigraði lið Golfklúbbs Mosfellsbæjar í úrslitaleik. Elsa Maren Steinarsdóttir lék stórt hlutverk í liði Leynis en hún var ein af þremur stúlkum sem kepptu með drengjaliðum í þessum aldursflokki. Lið Golfklúbbs Kópavogs og Garðabæjar sigraði lið Golfklúbbs Reykjavíkur í leiknum um þriðja sætið.
Í flokki stúlkna 18 ára og yngri sigraði lið Golfklúbbs Reykjavíkur, lið Golfklúbbs Mosfellsbæjar varð í öðru sæti og lið Golfklúbbs Kópavogs og Garðabæjar varð í þriðja sæti.
Í flokki drengja 16 ára og yngri sigraði lið Golfklúbbs Akureyrar, lið Golfklúbbs Kópavogs og Garðabæjar hafnaði í öðru sæti og lið Golfklúbbsins Keilis í þriðja sæti.
Annað liða Golfklúbbs Mosfellsbæjar fagnaði sigri á í flokki stúlkna 16 ára og yngri. Lið Golfklúbbs Kópavogs og Garðabæjar í öðru sæti og hitt liða Golfklúbbs Mosfellsbæjar hafnaði í þriðja sæti.
Lið frá Golfklúbbi Kópavogs og Garðabæjar voru í tveimur efstu sætunum í flokki drengja 14 ára og yngri. Annað tveggja liða Golfklúbbsins Keilis hafnaði í þriðja sæti.
Í flokki stúlkna 14 ára og yngri sigraði lið Golfklúbbs Kópavogs og Garðabæjar. Sameiginlegt lið Golfklúbbsins Keilis og Golfklúbbsins Setbergs hafnaði í öðru sæti. Liðin voru jöfn að stigum en innbyrðis sigur GKG gegn GK/GSE réði úrslitum um Íslandsmeistaratitilinn. Lið Golfklúbbs Reykjavíkur hafnaði í þriðja sæti.