Haraldur lék áfram gott golf og komst áfram í lokahringinn
„Ég sló mjög vel allan hringinn og lenti ekki í neinum vandræðum en pútterinn var ískaldur. Engu að síður fín frammistaða,“ sagði Haraldur Franklín Magnús að loknum þriðja hring á ISPS Handa World International á DP Evrópumótaröðinni í N-Írlandi.
Haraldur sagði að Galgorm völlurinn væri orðinn mjög þurr og margar pinnastaðsetningar erfiðar. Ég spilaði stöðugt golf, einn fugl og einn skolli á fyrri níu en svo kom annar fugl á 17. braut. Hélt ég þyrfti annan fugl á 18. holu út af þriðja niðurskurði og spilaði djarft. Gekk ekki en náði að bjarga pari. Hlakka til morgundagsins,“ sagði okkar maður sem er jafn í 21. sæti.
Mótið er á DP Evrópumótaröðinni en Haraldur er með þátttökurétt á Áskorendamótaröðinni. „Það er virkilega gaman að spila hér. Vil vera á þessari mótaröð og tel mig eiga fullt erindi þar og gott betur,“ sagði Haraldur Franklín.
Niðurskurðurinn á þriðja hring miðaðist við parið og eru 40 kylfingar á því skori og betra.