Haraldur endaði í 10. sæti
Haraldur Franklín hefur lokið leik á Emporada Challenge mótinu á Áskorendamótaröð Evrópu.
Fyrri níu holurnar í dag voru Haraldi erfiðar en hann lék þær á 2 höggum yfir pari. Hann sýndi mikinn karakter og lék frábærlega á seinni níu sem hann kláraði á 5 undir pari. Niðurstaðan því 68 högg og 13 undir pari samtals.
Haraldur endar mótið í 10. sæti ásamt þremur öðrum kylfingum. Hann fer upp um fjögur sæti á stigalistanum og er þá kominn í 46. sæti.
Julien Brun frá Frakklandi sigraði á mótinu á 18 höggum undir pari. Jon Thomson frá Englandi varð í öðru sæti höggi á eftir Brun. Thomson lék frábærlega í dag á 62 höggum þrátt fyrir að hafa fengið tvo skolla.
Síðasta mótið fyrir lokamótið þar sem 45 efstu bítast um 20 sæti á Evrópumótaröðinni hefst á fimmtudaginn.