Haotong sigraði á dramatískan hátt og fagnaði ógurlega
Hafði ekki sigrað á Evrópumótaröðinni síðan árið 2018
Li Haotong frá Kína sigraði á BMW International Open í umspili við Thomas Pieters frá Belgíu en mótið er hluti af Evrópumótaröðinni.
Haotong setti niður rúmlega 12 metra pútt fyrir fugli á fyrstu holu umspilsins og Pieters tókst ekki að svara því. Þetta var fyrsti sigur Haotong síðan árið 2018 þegar hann hafði betur á lokahringnum gegn sjálfum Rory McIlroy.
Þeir félagar léku hringina fjóra á 22 höggum undir pari. Haotong lék fyrsta hringinn á 62 höggum eða á 10 höggum undir pari vallarins í Munchen.
Nýsjálendingurinn Ryan Fox hafnaði í þriðja sæti á 20 höggum undir pari.
