Hansen sigraði í Dubai
Daninn Joachim B. Hansen tryggði sér sinn annan sigur á Evrópumótaröðinni á ferlinum þegar hann sigraði á Aviv Dubai Championship mótinu í gær.
Hansen lék af öryggi á lokahringnum, fékk fjóra fugla og fjórtán pör og endaði samtals á 23 höggum undir pari. Sigur hans var engu að síður naumur þar sem Bernd Wiesberger og Fransesco Laporta voru aðeins höggi á eftir.
Hansen sigraði síðast fyrir einu ári á Joburg Open mótinu en þessi 31 árs gamli Dani hefur sex sinnum þurft að fara í gegnum úrtökumótin til að tryggja þátttökurétt sinn á mótaröðinni.
Sigur Hansen var fjórði danski sigurinn í síðustu 10 mótum á Evrópumótaröðinni. Áður höfðu Jeff Winther og Hojgaard bræður sigrað nýlega.
Hansen færist með sigrinum upp í 43. sæti stigalista mótaraðarinnar.
