Fitzpatrick sigraði á Valderama
Matt Fitzpatrick vann sinn sjöunda sigur á Evrópumótaröðinni á ferlinum þegar hann sigraði á Estrella Damm Andalucia Masters á Valderama vellinum í gær.
Hann varð þar með fjórði yngsti kylfingurinn í sögu mótaraðarinnar til að ná sínum sjöunda sigri.
Fitzpatrick lék stöðugt golf í gær, fékk 15 pör í röð en náði svo fuglum á 16. og 17. braut og endaði svo á góðu pari á 18. Skollalaus lokahringur hjá Fitzpatrick en aðeins fimm kylfingar náðu því á Valderama þessa vikuna.
Sebastian Söderberg var með pálmann í höndunum þegar hann stóð á 17. teig og tveggja högga forystu á þeim tímapunkti. Hann ýtti teighögginu út til hægri og fann aldrei boltann. Lék 17. brautina á tvöföldum skolla og 18. á skolla og varð að sætta sig við 2. sætið ásamt Ástralanum Min Woo Lee.
Laurie Canter sem hafði þriggja högga forskot fyrir lokahringinn lék á 5 höggum yfir pari og varð að sætta sig við 4. sætið ásamt 5 öðrum kylfingum.
