Fékk albatross og fór holu í höggi á sama hringnum

Írinn Rowan McCarthy átti sinn eftirminnilegasta golfhring þann 5. janúar síðastliðinn. McCarthy sem er með 20 í forgjöf var þá við leik á Wembley Golf Club í Perth í Ástralíu.

Hringurinn sem var liður í punktakeppnismóti fór frekar venjulega af stað. Pör hér og þar, skollar nokkrir og einhverjar sprengjur.

Fyrst dró til tíðinda þegar McCarthy gerði sér lítið fyrir og fór holu í höggi á 12 braut sem er 169 metra löng. Rowan sló með 7 járni og boltinn hvarf í holu. Í sæluvímu lék hann næstu tvær brautir á tvöföldum og þreföldum skolla.

Svo gerðist það ótrúlega á 15. brautinni sem er par 5. Eftir gott teighögg sló hann með 5 járni af 185 metra færi og boltinn endaði í holu. Hann hafði þar með farið holu í höggi og fengið albatross á sama hringnum.

Skrautlegur hringur sem skilaði sér í þriðja lægsta skori ferilsins hjá þessum kylfingi. Hann fékk 39 punkta sem dugði til sigurs í mótinu.

Samkvæmt vefsíðunni doubleeagle.org er McCarthy 22. kylfingurinn sem afrekar að ná þessari tvennu á einum og sama hringnum. Á þeim lista er einnig goðsögnin John Wooden einn þekktasti körfuboltaþjálfari sögunnar.