Fréttir

Axel ekki viss með framhaldið
Páll Ketilsson
Páll Ketilsson skrifar
mánudaginn 24. október 2022 kl. 10:31

Axel ekki viss með framhaldið

„Þetta gekk ekki alveg upp í þetta skiptið. Ég var að gefa mer fín færi en náði ekki að nýta þau nógu vel þegar þau komu. Það vantaði herslumuninn siðustu tvö daga. Slá aðeins nær og eiga fleirri færi,“ segir Keiliskylfingurinn Axel Bóasson en hann endaði í 14. sæti á stigalista Nordic mótaraðarinnar í ár.

Axel þurfti að vera í 6.-10. sæti í lokamótinu á Mön í Danmörku til þess að fá takmarkaðan þátttökurétt á Áskorendamótaröðinni 2023 en endaði í 14. sæti eins og á stigalistanum. Í lokamótinu var Axel með næst besta skor eftir fyrsta hringinn en náði ekki að fylgja því nógu vel eftir í næstu tveimur.

Axel átt nokkur mjög góð mót á árinu á Nordic mótaröðinni og sigraði m.a. á einu móti í maí. En hvað tekur við hjá honum?

„Það kemur bara í ljós. Ég ætla að njóta þess að vera með fjölskyldunni næstu daga og ræða svo málin við mína nánustu hver næstu skref verða,“ sagði Axel.